Hii ni recipe ya kuku ambayo jirani zangu wote wanaomba nitengeneze kila tunapokuwa na sherehe au mikutano tofauti. Kuna watoto wa jirani pia wanaochukia nyama, wazazi wao wamenifata kuniambia hii ndiyo nyama pekee watoto wao wanakula. Ni rahisi kutengeneza, jaribu utupe majibu

Yaliyomo kwenye ukurasa huu:

Dakika 25 Idadi ya walaji 4 Rahisi

Mambo ya kuzingatia

Minofu ya kuku ni nyama unayoipata kutoka kwenye kifua au sehemu ya juu ya mapaja ya kuku. Nyama ya mapaja ya kuku huwa ni laini zaidi kuliko ya kifua, lakini zote ni tamu na zinapendeza sana kwa recipe hii

Kukoleza viungo kwa kuacha kwenye friji usiku mzima kama una muda kunaongeza radha nzuri zaidi kwenye kuku. Kuku anayewekewa tangawizi na kitunguu saumu hulainika vizuri pia, kwa hiyo ukikaanga atakuwa crispy (kaukau) nje na mlaini ndani; ndiyo lengo letu kubwa

Viungo vinavyokosekana mahali ulipo mbali na kitunguu saumu na tangawizi vinaweza kubadilishwa. Unaweza pia kuongeza viungo vingine mbalimbali ambavyo unavipenda na umevizoea

Chenga za mkate au Bread Crumbs zinapatikana kwa wingi madukani na supermarkets. Ukiweza tumia zenye jina la PANKO, zinakuwaga nzuri zaidi. Ukikosa Panko tumia zinazopatikana

Moto wakati wa kukaanga usiwe mkali sana ukababua kuku nje akatoka mbichi ndani. Moto ukiwa mdogo sana pia kuku atanyonya mafuta na hatakauka vizuri. Hakikisha moto ni sahihi katika kukaanga

Usijaze sana kikaango acha kuku waive kwa nafasi na usawa. Kama una kikaango kidogo, pika kidogokidogo ila kuhakikisha wanaiva vizuri

Hakikisha mafuta yamechemka vizuri wakati unaweka kuku. Mafuta yasipochemka vizuri kuku atanyonya mafuta wakati wa kula utakinai na hutafurahia. Mafuta yasiyocheka pia yanafanya kuku asikauke vizuri

Tissues za jikoni au gazeti ni muhimu sana unapotoa kuku kwenye mafuta. Huu husaidia kufyonza mafuta yaliyobakia ili kuku asiwe na mafutamafuta wakati wa kula

Video

Angalia Video hapa jinsi ya kutengeneza hatua kwa hatua. Usisahau kusubscribe kwenye channel yetu ya YouTube

Mahitaji

500g/ nusu kg minofu ya kuku
Vikombe 2 vya chai chenga za mkate (Bread crumbs)
Vijiko 3 vya chakula unga wa ngano
Mayai 2
Kijiko 1 cha chakula tangawizi na kitunguu saumu
Chumvi na pilipili manga kwa kuonja
Mafuta ya kukaangia

Maelekezo hatua kwa hatua

Hatua ya 1

Osha, kausha na katakata minofu ya kuku vipande virefu vyembamba kiasi

Hatua ya 2

Kwenye bakuli kubwa, changanya vizuri vipande vya kuku tangawizi na kitunguu saumu; chumvi na pilipili manga. Funika bakuli, weka kwenye jokofu/ friji kwa muda wa nusu saa au mpaka masaa 24. Jinsi anavyoendelea kukaa ndiyo anavyozidi kupendeza

Hatua ya 3

Chemsha mafuta kwenye kikaangio moto wa juu kiasi. Wakati mafuta yanachemka, piga mayai kwenye bakuli. Weka unga wa ngano na chenga za mkate kwenye sahani tofauti pana iwe rahisi kuchovya

Hatua ya 4

Paka vipande vya kuku unga wa ngano, halafu chovya kwenye mayai yaliyopigwa na mwishoni zungushia kuku wako chenga za mkate. Kwa kutumia mkono, gandamiza chenga kwenye kuku zishike vizuri

Hatua ya 5

Weka kuku kwenye mafuta yaliyochemka, acha aive hadi awe na rangi ya kahawia na mkavu kwa juu. Unaweza kuongeza na kupunguza moto ikibidi

Hatua ya 6

Kuku akiiva, weka kwenye sahani yenye tissues za jikoni ili tissues zifyonze mafuta

Majadiliano

embedd discussion component here.

Comments

Join discussion.