Maini ya kuku ni mboga rahisi sana na tamu kama utaipatia kupika, na pia unaweza kuyachukia endapo utakosea kuipika. Jaribu recipe yatu utupe mrejesho

Yaliyomo kwenye ukurasa huu:

• Mambo ya kuzingatia
• Video
• Mahitaji
• Maelekezo hatua kwa hatua
• Majadiliano

Mambo ya kuzingatia

Maini ya kuku ni tofauti na ya ngómbe. Maini ya kuku ni malaini zaidi, hivyo huiva kwa haraka zaidi na pia ni rahisi kumong´onyoka endapo utakosea kuyapika

Mafuta ni muhimu kwenye maini kama utataka yapendeze. Tumia mafuta mazuri kiafya kama Olive oil. Maini wakinyimwa mafuta hawapendezi

Kitunguu, pilipili hoho na karoti zinapendeza zikikatwa ukubwa unaokaribiana na ukubwa wa maini. katakata vipande vikubwa vikubwa vitakavyokaribiana na ukubwa wa vipande vya maini

Kaanga maini na mafuta, kitunguu saumu na tangawizi kwanza mpaka yaive ndio uchanganye kwenye sosi ya nyanya ili yasipondeke

Ongeza viungo utakavyopenda kama pilipili, ndimu, limao na vinginevyo kuongeza radha

Mbogamboga yani kitunguu, karoti na pilipili hoho zinapendeza zisipoiva sana na kubadilika rangi

Video

Angalia Video hapa jinsi ya kutengeneza hatua kwa hatua. Usisahau kusubscribe kwenye channel yetu ya YouTube

Mahitaji

Kilo moja maini
Vijiko 4 vya chakula mafuta ya kupikia
Kijiko 1-1/2 cha chakula kitunguu saumu na tangawizi
Chumvi kwa kuonja
Kijiko 1 cha chai binzari ya manjano
Kitunguu 1 kikubwa
Nyanya 3-4 za wastani
Karoti 1 kubwa
Pilipili hoho 1/2 x 3 rangi tofauti
Maji kiasi
1/2 kikombe majani ya kotimiri au giligilani

Maelekezo hatua kwa hatua

Hatua ya 1

Andaa viungo; katakata kitunguu, nyanya, pilipili hoho na karoti vipande vinavyokaribiana ukubwa wa maini. Visiwe vidogo sana wala vikubwa sana. Katakata na majani ya giligilani, weka pembeni

Hatua ya 2

Weka vijiko 3 vya chakula kwenye kikaango, yakichemka ongeza maini, kitunguu saumu na tangawizi pamoja na chumvi. Changanya vizuri, kuwa muangalifu unapochanganya na kugeuza maini yasimon´gonyoke. Geuza moja moja kwanza mpaka yote yapate rangi ya kahawia na yawe magumu kiasi ndio uyachanganye kwa pamoja. Kaanga maini kila upande kwa dakika 2 mpaka 3; au mpaka yawe na rangi nzuri ya kahawia na yaive ila yasiive sana yakakauka

Hatua ya 3

Pakua maini kwenye sahani, weka pembeni kisha ongeza kijiko 1 cha mafuta yaliyobakia kwenye kikaango

Hatua ya 4

Mafuta yakichemka ongeza kitunguu,kaanga mpaka kilainike ila kisikauke sana. Ongeza nyanya, karoti na chumvi kiasi ya kutosha kwenye nyanya. Funika na mfuniko, pika mpaka nyanya zilanike vizuri. Nyanya zikiiva unaweza kutoa maganda ya nyanya kama huyapendi

Hatua ya 5

Ongeza pilipili hoho na maji kiasi kama sosi itakuwa kavu sana. Kaanga kwa dakika kama 2-3 au mpaka pilipipi hoho ziive kiasi tu. Kama unapenda mchuzi mwingi, ongeza maji kiasi utakachopenda, acha yatokote kabisa ndio uweke maini

Hatua ya 6

Rudisha maini kwenye kikaanga uyachanganye vizuri na viungo vingine, mpaka yapate tu moto. Usiyaache yakae muda mrefu kwenye moto

Hatua ya 7

Ongeza majani ya giligilani, changanya vizuri. Ipua na kupakua

Hatua ya 8

Enjoy na chakula utakachotaka

Comments

Join discussion.