Wali wa kukaanga ni njia mojawapo wa kubadilisha kiporo cha wali na kukifanya chakula fresh kitamu na chenye virutubisho vingi. Viungo vya muhimu katika wali huu kutokana na waanzlishi wake ni kitunguu saumu, mayai na sosi ya soya. Unaweza kuongeza viungo vyovyote utakavyopenda wewe kama mbogamboga, nyama, sausages, samaki na kadhalika. Kwa leo tumetumia sausages, karoti na brokoli kukamilisha pishi letu
DSC08964

Yaliyomo kwenye ukurasa huu:

Dakika 30 Idadi ya walaji 4-6 Rahisi

Mambo ya kuzingatia

DSC08947
Kiporo cha wali wa baridi kinapendeza zaidi kwenye pishi hili kuliko wali fresh. Ukitumia kiporo, wali utatoka vizuri zaidi. Endapo unatumia wali fresh, unaweza kusambaza kwenye chombo cha kuokea ukaweka kwenye freezer kwa dakika 10 mpaka 15 kabla ya kupika

Sosi ya soya ni moja ya viungo muhimu sana kwenye kupika wali wa kukaanga. Sosi ya soya inaongeza radha na rangi nzuri kwenye wali

Mafuta ya ufuta yanaongeza radha nzuri sana kwenye wali huu, ila kuwa muangalifu ukizidisha kidogo sana yanaharibu radha nzima. Mafuta ya ufuta yana harufu nzito kwa hiyo tumia kiasi kama maelekezo kwenye vipimo

Viungo tofauti kama nanasi, zabibu kavu, mbogamboga za aina tofauti, nyama za aina tofauti, samaki wa aina tofauti na kadhalika vinaweza kuongezwa kwenye wali

Mapishi ya wali wa kukaanga ni rahisi na yanaenda haraka sana. Hakikisha umeandaa viungo vyote kabla ya kuanza kupika. Ukichelewa kidogo viungo vinaweza kupitiliza kuiva au hata kuungua na kuharibu ubora na radha ya chakula

Kukaanga mayai unaweza kukaanga mayai pembeni ukayakatakata kisha ukachanganya mwishoni kwenye wali au kuyakoroga wakati wa kukaanga kama nilivyofanya

Video

Angalia Video hapa jinsi ya kutengeneza hatua kwa hatua. Usisahau kusubscribe kwenye channel yetu ya YouTube

Mahitaji

Vikombe 4 vya chakula wali uliopikwa
200g sausages utakazopenda
Karoti 2 za wastani, menya na katakata vipande vidogovidogo vya mraba
Kikombe 1 brokoli, katakata kama vimaua
Mayai 3, yapige
Vitunguu vya majani 4, gawanya vyeupe na kijani
1/3 kikombe mahindi ya kuchemsha ya ya kopo
Vijiko 3 vya chakula mafuta ya kupikia
Pilipili manga (nyeupe) kwa kuonja
Kijiko 1 cha chai kitunguu saumu na tangawizi
Vijiko 4 vya chakula sosi ya soya nyepesi (light)
Kijiko 1 cha chakula mafuta ya ufuta

Maelekezo hatua kwa hatua

Hatua ya 1

Andaa viungo vyote weka pembeni karibu na jiko ili usichelewe katika kuongeza viungo. Katakata sausages na karoti vipande vidogovidogo vya mraba. Gawanya vitunguu vya majani mara mbili, sehemu nyeupe ya chini peke yake na majani ya juu peke yake. Katakata na kuweka pembeni. Piga na mayai, weka pembeni

Hatua ya 2

Kwenye kikaango katika moto wa wastani, chemsha mafuta. Ongeza vitunguu sehemu nyeupe ya chini pamoja na paste ya kitunguu saumu na tangawizi. Kaanga mpaka harufu ya ubichi iishe na vilainike, ila visibadilike rangi

Hatua ya 3

Ongeza karoti na brokoli, endelea kukaanga mpaka zikaribie kuiva, ukiweka uma uingie mpaka ndani, ila zisilainike sana. Unaweza kuongeza maji kidogo sana ili mboga zisibadilike rangi na ziive vizuri

Hatua ya 4

Ongeza sausages na mahindi. Pika kwa dakika kama 2 nyingine au mpaka uone zimechanganyikana vizuri na sausages zimepata moto wa kutosha
C0222T01

Hatua ya 5

Tumia mwiko kuhamishia viungo vyote upande mmoja wa kikaango, kisha ongeza mafuta kiasi upande ulio wazi. Piga mayai, weka kwenye upande wenye mafuta. Yakoroge haraka sana yasipate mabonge kisha changanya kila kitu pamoja kwa haraka

Hatua ya 6

Ongeza wali na sosi ya soya. Changanya mpaka wali upate tu joto, usipike muda mrefu viungo vikaiva sana. Ongeza mafuta ya ufuta na vitunguu vya majani. Changanya na ipua haraka vitunguu vya majani visiive sana
DSC08940-1

Hatua ya 7

Pakua cha moto na enjoy na chochote utakachopenda kama chachandu, matunda, juice fresh na kadhalika

Comments

Join discussion.